ពិភពលោកដែលយើងកំពុងរស់នៅ កំពុងតែផ្លាស់ប្តូរយ៉ាងឆាប់រហ័ស ហើយបច្ចេកវិទ្យាបញ្ញាសិប្បនិម្មិត (AI) គឺជាកម្លាំងចលករដ៏ចម្បងមួយនៅពីក្រោយការផ្លាស់ប្តូរនេះ។ ពីរបៀបដែលយើងធ្វើការងារ រៀនសូត្រ រហូតដល់ការកម្សាន្ត បញ្ញាសិប្បនិម្មិតបាននិងកំពុងក្លាយជាផ្នែកមួយនៃជីវិតប្រចាំថ្ងៃរបស់យើង។ នៅចំពេលនៃការវិវត្តដ៏ឆាប់រហ័សនេះ សំណួរដ៏សំខាន់មួយបានកើតឡើងសម្រាប់យើងទាំងអស់គ្នា ទាំងសិស្សានុសិស្ស ឪពុកម្តាយ និងអ្នកដឹកនាំ នោះគឺ៖ តើយើងនឹងត្រៀមខ្លួនកសាងអនាគតរបស់យើងជាមួយនឹងបច្ចេកវិទ្យានេះដោយរបៀបណា?

Hour of AI ត្រូវបានបង្កើតឡើងដើម្បីឆ្លើយតបទៅនឹងតម្រូវការដែលកំពុងកើនឡើង ក្នុងការកសាងការយល់ដឹងពីមូលដ្ឋានគ្រឹះនៃបញ្ញាសិប្បនិម្មិត (AI) ស្របពេលជាមួយនឹងការសិក្សាពីវិទ្យាសាស្ត្រកុំព្យូទ័រ និងជាជំហានដំបូងដ៏សំខាន់មួយ ក្នុងការបំពាក់ជំនាញចាំបាច់ដល់យុវជន ដើម្បីស្របតាមការវិវត្តនៃបច្ចេកវិទ្យាទាំងក្នុងពេលបច្ចុប្បន្ន និងទៅអនាគត។

នៅ Tech for Kids Academy ការចូលរួមគាំទ្រចលនានេះ គឺផ្សារភ្ជាប់យ៉ាងជ្រាលជ្រៅទៅនឹងទស្សនវិជ្ជាអប់រំរបស់យើង។ វាគឺជាការអនុវត្តជាក់ស្ដែងនូវបេសកកម្មស្នូលរបស់យើងក្នុងការ «បណ្តុះផ្នត់គំនិតនៃអ្នកបង្កើត មិនមែនត្រឹមតែជាអ្នកប្រើប្រាស់បច្ចេកវិទ្យា»។ យើងជឿជាក់យ៉ាងមុតមាំថា ដើម្បីឲ្យយុវជនជំនាន់ក្រោយអាចដឹកនាំបាន ពួកគេមិនត្រូវរៀនត្រឹមតែ "របៀបប្រើ" បច្ចេកវិទ្យានោះទេ តែប្អូនៗត្រូវតែយល់ពី «របៀបដែលវាដំណើរការ» «របៀបបង្កើតវា» និងសំខាន់ជាងនេះទៅទៀតគឺ «របៀបប្រើប្រាស់វាប្រកបដោយការទទួលខុសត្រូវ»។

នៅក្នុងកម្មវិធី Hour of AI កាលពីថ្ងៃទី ៨ ខែវិច្ឆិកា ឆ្នាំ ២០២៥ កន្លងទៅនេះ ប្អូនៗសិស្សានុសិស្សរបស់យើងបានចូលរួមយ៉ាងសកម្មក្នុងគម្រោងខ្លីៗ និងសកម្មភាពអនុវត្តជាក់ស្តែងជាច្រើន។ ប្អូនៗបានស្វែងយល់ដោយផ្ទាល់ពីរបៀបដែលបញ្ញាសិប្បនិម្មិតដំណើរការនៅពីក្រោយហ្គេម និងកម្មវិធីដែលខ្លួនធ្លាប់ស្គាល់។

បទពិសោធន៍នេះមានសារៈសំខាន់ខ្លាំងណាស់ ព្រោះវាបានជួយប្អូនៗឲ្យមើលឃើញបច្ចេកវិទ្យានេះក្នុងទស្សនវិស័យថ្មីមួយ ដោយអាចចាប់ផ្ដើមគិតពីរបៀបប្រែក្លាយគំនិតច្នៃប្រឌិតរបស់ខ្លួន ទៅជាដំណោះស្រាយសម្រាប់បញ្ហានៅក្នុងសហគមន៍ និងសង្គមបាន។ ប្អូនៗបានយល់យ៉ាងច្បាស់ថា បញ្ញាសិប្បនិម្មិតមិនមែនជាអ្វីដែលដំណើរការដោយខ្លួនឯងនោះទេ។ ផ្ទុយទៅវិញ ប្អូនៗទៅវិញទេ ដែលជាអ្នកបញ្ជា និងផ្តល់ទិសដៅឲ្យឧបករណ៍ដ៏មានសក្ដានុពលមួយនេះ តាមរយៈភាពច្នៃប្រឌិត និងទិន្នន័យដែលពួកគេផ្តល់ឲ្យ។

សរុបមក ផ្នត់គំនិតនៃអ្នកបង្កើតដែលប្រកបដោយការទទួលខុសត្រូវនេះហើយ ដែលជាជំនាញដ៏សំខាន់បំផុតសម្រាប់សតវត្សរ៍ទី២១។ គោលដៅរបស់យើង តាមរយៈកម្មវិធីដូចជា Hour of AI គឺដើម្បីត្រៀមយុវជនជំនាន់ក្រោយឲ្យក្លាយជាអ្នកដឹកនាំ មិនមែនត្រឹមតែជាអ្នកប្រើប្រាស់នៅក្នុងយុគសម័យថ្មីនៃបច្ចេកវិទ្យានេះទេ។

ជាចុងក្រោយ Tech for Kids Academy សូមថ្លែងអំណរគុណយ៉ាងជ្រាលជ្រៅចំពោះប្អូនៗសិស្សានុសិស្ស និងមាតាបិតាអាណាព្យាបាល ដែលបានចំណាយពេលដ៏មានតម្លៃចូលរួមជាមួយពួកយើង។ យើងសង្ឃឹមយ៉ាងមុតមាំថា បទពិសោធន៍មួយម៉ោងនេះ នឹងក្លាយជាចំណុចចាប់ផ្ដើមដ៏សំខាន់មួយ ដែលជំរុញទឹកចិត្តឲ្យប្អូនៗបន្តស្វែងយល់បន្ថែមពីវិស័យបច្ចេកវិទ្យា និងត្រៀមខ្លួនក្លាយជាអ្នកដឹកនាំការអភិវឌ្ឍបច្ចេកវិទ្យារបស់កម្ពុជានាថ្ងៃអនាគត។