នៅក្នុងយុគសម័យនៃការធ្វើបរិវត្តកម្មឌីជីថល ដែលបច្ចេកវិទ្យាបញ្ញាសិប្បនិម្មិត (AI) និងនវានុវត្តន៍កំពុងកំណត់ឡើងវិញនូវនិន្នាការសេដ្ឋកិច្ចសកល ការរៀបចំធនធានមនុស្សឱ្យដើរទាន់សភាពការណ៍ គឺជាភាពចាំបាច់មិនអាចខ្វះបាន។ នាថ្ងៃទី២៥ និងទី២៦ ខែកក្កដា ឆ្នាំ២០២៦ កន្លងទៅ Tech for Kids Academy បានរៀបចំព្រឹត្តិការណ៍ថ្នាក់ជាតិ RISE Week 2026 (Regional Innovation for STEM & Entrepreneurship Week) ប្រកបដោយភាពជោគជ័យយ៉ាងត្រចះត្រចង់ នៅសាកលវិទ្យាល័យអាមេរិកាំងភ្នំពេញ (AUPP)។

កម្មវិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម ជុន វ៉ាត រដ្ឋលេខាធិការក្រសួងប្រៃសណីយ៍ និងទូរគមនាគមន៍ តំណាងដ៏ខ្ពង់ខ្ពស់ ឯកឧត្តមបណ្ឌិត ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំក្រសួង ដៃគូអភិវឌ្ឍន៍ លោកគ្រូអ្នកគ្រូ អាណាព្យាបាល និងសិស្សានុសិស្សយ៉ាងច្រើនកុះករ។

ព្រឹត្តិការណ៍ដ៏រស់រវើកនេះ បានក្លាយជាវេទិកាដ៏សំខាន់ក្នុងការផ្លាស់ប្តូរចំណេះដឹង ជំរុញនវានុវត្តន៍បច្ចេកវិទ្យា និងសហគ្រិនភាព។ ក្នុងឱកាសនោះ ឯកឧត្តមរដ្ឋលេខាធិការទាំងពីរបានអញ្ជើញចុះជួបសំណេះសំណាលផ្ទាល់ជាមួយអ្នកនវានុវត្តន៍វ័យក្មេង ដែលនេះជាសក្ខីភាពបញ្ជាក់យ៉ាងច្បាស់ពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការជំរុញការអប់រំ STEM ចំណេះដឹងឌីជីថល និងការពង្រឹងសមត្ថភាពយុវជននៅកម្ពុជា។

ពេញមួយរយៈពេលពីរថ្ងៃ ព្រឹត្តិការណ៍នេះបានបង្ហាញយ៉ាងច្បាស់ថា យុវជនកម្ពុជាមានសក្តានុពលពេញលេញក្នុងការប្រែក្លាយខ្លួនពីត្រឹមជា "អ្នកប្រើប្រាស់បច្ចេកវិទ្យា" ទៅជា "អ្នកបង្កើតដំណោះស្រាយ"។ នៅក្នុងការប្រកួតប្រជែងថ្នាក់ជាតិរបស់កម្មវិធី Technovation x Future Digital Talents យុវជនបានឡើងធ្វើបទបង្ហាញដោយភាពក្លាហាន នូវកម្មវិធីទូរស័ព្ទដៃ (Mobile Apps) និងដំណោះស្រាយបញ្ញាសិប្បនិម្មិត (AI) ដែលពួកគេបានស្រាវជ្រាវ និងអភិវឌ្ឍឡើង ដើម្បីឆ្លើយតបទៅនឹងបញ្ហាក្នុងសហគមន៍របស់ពួកគេ។

ទន្ទឹមនឹងនេះ កម្មវិធី Coolest Projects Cambodia ដែលធ្វើឡើងក្រោមកិច្ចសហការជាមួយ Raspberry Pi Foundation ពីចក្រភពអង់គ្លេស បាននាំមកនូវមាតិកាសិក្សា និងធនធានអប់រំបច្ចេកវិទ្យាកម្រិតអន្តរជាតិមកកាន់កម្ពុជា។ សាធារណជនបានទស្សនាស្នាដៃបច្ចេកវិទ្យា ដ៏គួរឱ្យស្ញប់ស្ញែង ដែលសិស្សានុសិស្សបានបង្កើតឡើងដោយការគិតគូរយ៉ាងល្អិតល្អន់។ មិនតែប៉ុណ្ណោះ កម្មវិធី Game Quests 2026 ក៏បានទាក់ទាញចំណាប់អារម្មណ៍យ៉ាងទូលំទូលាយ ដោយសិស្សានុសិស្សបានដាក់តាំងបង្ហាញវីដេអូហ្គេមដែលពួកគេបានបង្កើតឡើងដោយផ្ទាល់ដៃ ដែលទាមទារនូវការសហការគ្នាទាំងលើជំនាញសរសេរកូដ គំនិតច្នៃប្រឌិត និងការដោះស្រាយបញ្ហាតក្កវិទ្យា។

RISE Week 2026 មានអត្ថន័យទូលំទូលាយលើសពីការតាំងបង្ហាញគម្រោង តាមរយៈការដើរតួជាវេទិកាសម្រាប់ការចែករំលែកចំណេះដឹង និងបទពិសោធន៍ជាក់ស្តែង។ វេទិកាពិភាក្សា Pie and AI Panel Discussions បានក្លាយជាកន្លែងដែលវាគ្មិនកិត្តិយស និងអ្នកជំនាញ ពិភាក្សា និងចែករំលែកពីឥទ្ធិពលនៃបញ្ញាសិប្បនិម្មិត លើអនាគតនៃការអប់រំ និងកាលានុវត្តភាពការងារ ដែលជួយបើកការគិតរបស់យុវជនឱ្យត្រៀមខ្លួនរួចជាស្រេចក្នុងយុគសម័យ AI។

អ្វីដែលគួរឱ្យកត់សម្គាល់ និងចាក់ដោតអារម្មណ៍បំផុតនោះ គឺកិច្ចពិភាក្សារបស់អតីតសិស្សឆ្នើម TKA Alumni Panel Discussion ក្រោមប្រធានបទ "Beyond the Classroom: How Competitions, Leadership, and Extracurricular Activities Can Transform Your Future"។ តាមរយៈកិច្ចពិភាក្សានេះ អតីតសិស្សបានចែករំលែកបទពិសោធន៍ផ្ទាល់ពីរបៀបដែលការចូលរួមក្នុងសកម្មភាពក្រៅថ្នាក់រៀន ការហ៊ានប្រឈមមុខនឹងការបរាជ័យ ការចាប់យកតួនាទីជាអ្នកដឹកនាំ និងការតស៊ូក្នុងកម្មវិធីប្រកួតប្រជែងនានា បានជួយពង្រីកសក្តានុពល កសាងទំនុកចិត្ត និងបើកទ្វារឆ្ពោះទៅរកឱកាសការងារដ៏ល្អប្រសើរ។ នេះគឺជាសាររំលឹកដ៏សំខាន់មួយថា ការអភិវឌ្ឍសមត្ថភាពពិតប្រាកដ និងភាពជាអ្នកដឹកនាំ គឺកើតចេញពីការរៀនសូត្រទាំងនៅក្នុង និងក្រៅថ្នាក់រៀន។ មិនត្រឹមតែប៉ុណ្ណោះ នៅក្នុងឱកាសនេះ Tech for Kids Academy ក៏បានប្រកាសជាផ្លូវការនូវការបង្កើត TKA Alumni Platform ផងដែរ។ វេទិកានេះត្រូវបានរៀបចំឡើងជាពិសេសសម្រាប់ឱ្យអតីតសិស្សទាំងអស់អាចរក្សាទំនាក់ទំនងយ៉ាងជិតស្និទ្ធ ចែករំលែកឱកាសការងារ ផ្តល់ការណែនាំដល់សិស្សប្អូនជំនាន់ក្រោយ និងបន្តអភិវឌ្ឍបណ្តាញវិជ្ជាជីវៈរបស់ពួកគេដើម្បីធានាបាននូវសហគមន៍គាំទ្រដ៏រឹងមាំមួយសម្រាប់អ្នកដឹកនាំបច្ចេកវិទ្យាកម្ពុជានាពេលអនាគត។

ភាពជោគជ័យនៃព្រឹត្តិការណ៍ RISE Week 2026 គឺជាសក្ខីភាពបញ្ជាក់ពីសមិទ្ធផលដែលអាចសម្រេចបាន នៅពេលដែលប្រព័ន្ធអេកូឡូស៊ីទាំងមូលរួបរួមគ្នាក្រោមចក្ខុវិស័យតែមួយ ក្នុងការលើកកម្ពស់យុវជនជំនាន់ក្រោយ។ RISE Week 2026 បានបង្ហាញយ៉ាងច្បាស់ថា នៅពេលដែលយុវជនទទួលបានឱកាស ការតម្រង់ទិស និងវេទិកាអប់រំដ៏ស័ក្តិសម សមត្ថភាព និងគំនិតច្នៃប្រឌិតរបស់ពួកគេគឺគ្មានដែនកំណត់ឡើយ។

សមិទ្ធផលដ៏ធំធេងនេះ មិនអាចលេចចេញជារូបរាងបានឡើយប្រសិនបើគ្មានការចូលរួមជ្រោមជ្រែងពីគ្រប់ភាគីពាក់ព័ន្ធ។ កម្មវិធីនេះអាចដំណើរការទៅបានយ៉ាងជោគជ័យដោយការគាំទ្ររបស់ ក្រសួងប្រៃសណីយ៍ និងទូរគមនាគមន៍ ក្រសួងអប់រំ យុវជន និងកីឡា ក្រោមការឧបត្ថម្ភធំពី មូលនិធិ ស.អ (CBRD fund) រៀបចំដោយ Tech for Kids Academy សហការរៀបចំដោយ Toptimize និង Education and Future Abroad ការឧបត្ថម្ភដោយ សហគ្រិនខ្មែរ ការឧបត្ថម្ភទីតាំងដោយ American University of Phnom Penh និង AUPP Liger Leadership Academy ដៃគូដឹកជញ្ជូន Grab Cambodia និងដៃគូផ្សព្វផ្សាយ ស៊ីស៊ីថាមស៍ និង B2B Asia News ផងដែរ។

យើងខ្ញុំជឿជាក់យ៉ាងមុតមាំថា កិច្ចសហការដ៏រឹងមាំនេះ នឹងបន្តជាគ្រឹះក្នុងការអភិវឌ្ឍធនធានមនុស្សឌីជីថលកម្ពុជាឱ្យកាន់តែរីកចម្រើននាពេលអនាគត។